مكرونة بشاميل

-طريقة عمل المكرونة بالبشاميل

المكرونة بالبشاميل ميختلفش عليها اتنين الكل بيحبها و من الاكلات اللى بتتكرر كتير.

الاول بنسلق مكرونة فرن عادى و نصفيها ، بعدها نعصج اللحمة المفرومة بنجيب بصلة مفرومة نشوحها بالسمنة لحد ما لونه يدبل ننزل باللحمة المفرومة و نحط توابل ( ملح / فلفل / توم بودر / بصل بودر / بهارات ) و نقلب لحد ما اللحمة تتعصج و تستوى نقفل ، ممكن تحطي عليها معلقتين صلصة و انتى بتعصجيها بس دا حسب الرغبة ، البشاميل بقي بتجيبي ٥ معالق كبار زبدة مثلا عليهم ٣ معالق كبار دقيق و تقلبى لحد ما لون الدقيق يبقي دهبى تطفى و تسيبيه يهدى شوية ، تكونى مجهزة اللبن بارد مش سخن و تنزلى على الدقيق واحدة واحدة مع التقليب لحد ما يمتزج تماما ، نحطه على النار تانى مع استمرار التقليب و تحطى اى نوع جبنة عندك نستو / موتزاريلا / كريمى / رومى / شيدر اللى تحبيه و كله بيديها طعم ، نجيب كوباية فيها ماية نهرس فيها مرقة دجاج و شوية فلفل اسود و نرميهم على البشاميل و نقلب لحد ما يوصل للقوام الكريمى لا تقيل و لا خفيف ، ناخد شوية من البشاميل نخلطهم بالمكرونة ، و لو اللحمة المفرومة كتير خدى شوية الاول اخلطيهم بالمكرونة زى ما تحبى يعنى ، فى الاخر نجيب صينية نحط الاول طبقة المكرونة بالبشاميل عليها طبقة لحمة مفرومة عليها طبقة مكرونة تانى و على الوش باقى البشاميل و فى الاخر جبنة موتزاريلا / جبنة تركي / جبنة رومى مبشورة اللى عندك ، بس كدا تدخليها الفرن على درجة حرارة ٢٠٠ و تتابعيها لحد ما وشها ياخد اللون و تستوى بألف هنا.