كشرى

-طريقة عمل الكشرى 

الكشرى المصرى الاصيل الوجبة المفضلة للمصريين 👌 خطواته اه كتيرة بس سهلة.

 أولاً : هنقسمه على ٤ اقسام 

 : القسم الاول 

هنسلق المكرونة الاسباجتى و نصفيها و فى حلة تانية هنحط شوية زيت نحمر الشعرية جامد و ننزل بالرز يتشوح شوية و نزود ماية و نظبط الملح و نقلب و نوطى على الاخر و نغطى لحد ما يكمل سواه 

القسم التانى : 

الحمص و العدس نكون نقعينهم من بالليل عشان مياخدوش وقت فى السوا ، هنسلق العدس مع معلقة كمون و نسيبه يغلى لحد ما ينزل الماية بتاعته عشان بينزل لون غامق بيغمق الرز لحد ما يستوي و نصفيه ، فى حلة تانية صغيرة نغلى الحمص مع معلقة كمون لغاية ما يستوى.

القسم التالت : 

نجيب عصير طماطم مع معلقة صلصة نحطها على النار لحد ما تتسبك ، نفرم توم و نحط عليه ( ملح / شطة / جوزة الطيب / فلفل اسود / بابريكا / كمون / كسبرة ناشفة ) و نحمرهم زى طشة الملوخية كدا و نحطها على صلصة الطماطم ، فى نفس الوقت هنقطع شرايح بصل ابيض و نحط عليه معلقة خل و رشة دقيق عشان البصل يكون مقرمش ، نحمره فى زيت غزير سخن اول ما يوصل للون الدهبى نطلعه.

القسم الرابع : 

الدقة ( كوب خل صغيرة / كوب ماية / ٥ فصوص توم / ٢ ليمون / معلقة صغيرة كسبرة ناشفة / معلقة كبيرة كمون / بابريكا ) 

الشطة ( شوية زيت / ربع كوب شطة / كوب صلصة طماطم من بتاعة الكشرى و نخففها بالماية )