الشيش طاووق

-طريقة عمل الشيش طاووق

الشيش طاووق بتجيبي صدور فراخ او وراك الوراك اطعم بس زى ما تحبى و تقطعيها قطع صغيرة.

تتبيلة الشيش طاووق :

٢ طماطم / بصلة صغيرة / قرن فلفل / معلقة صغيرة هريسة شطة للى بيحبها / معلقة صغيرة بهارات فراخ / معلقة صغيرة بابريكا / معلقة صغيرة فلفل اسود / معلقة صغيرة كمون / فصين توم / مرقة دجاج / معلقتين خل.

هنحط كله فى الخلاط مع ربع كوباية ماية ، بعد ما يتخلطو هنجيب بولة نصب فيها الخليط و عليهم معلقتين زيت / نص لمونة / علبة زبادى / نص معلقة ملح صغيرة. 

هنخلطهم كويس و نحط فيها قطع الفراخ و نسيبهم فى التتبيلة ساعتين فى التلاجة و يفضل نسيبهم ليلة كاملة عشان تشرب التتبيلة ، بعدين نقطع بصل / فلفل الوان / طماطم و نسخيهم . 

نجيب جريل او طاسة عادية نحط معلقتين زيت يسخن كويس و ننزل بالاسياخ و نقلب لحد ما يستو كويس و بعد ما نخلص هنجيب فحمة نولعها و نسخنها و نحطها علي ورقة فويل و نحط على الفحمة معلقة سمنة و نغطيها بغطا و نسيبها ١٠ دقايق و الف هنا. 

لو هنعمل جنبه مكرونة يبقي ناخد من تتبيلة الشيش و نحطها مع المكرونة مع التسبيكة و نعمل المكرونة عادى او ممكن نعمل معاه رز بالخضار نجيب بصلة متوسطة نخرطها ناعم و نحمرها كويس و نحط عليها معلقة كركم و مرقة دجاج و نحط الجزر و البسلة و نقلب عليهم الرز و نفضل نشوح فيهم شوية ، بعدين نغلى ماية و نحطها عليهم و نظبط الملح و اما يغلى نوطي و نغطي و نسيبه لحد ما يستوي.