فتة شاورما

-طريقة عمل فتة الشاورما

بنجيب صدور فراخ نقطعها قطع صغيرة ، و نقطع ( بصل / طماطم / فلفل الوان / فصين توم ) ، نجيب طاسة فيها معلقة سمنة و ننزل الفراخ الاول تاخد صدمة و اول ما لونها يبقي ابيض كدا ننزل باقى المكونات و نحط توابل ( ملح / فلفل اسود / زعتر / كمون / بهارات فراخ / روزمارى او ريحان لو عندك ) ، نفضل نشوح فيهم لحد ما تستوى الفراخ.

فى نفس الوقت نغسل الرز و فى حلة معلقة صغيرة زيت او سمنة و نشوح الرز شوية و ننزل بالشوربة و نظبط الملح و نحط ( كركم / كارى ) عشان الرز يبقي لونه اصفر ، تغلى الشوربة نوطى و نغطى و يستوى الرز على نار هادية ، اخر حاجة بنجيب العيش الشامى نقطعه مكعبات و نقليه فى زيت سخن غزير لحد ما يوصل للون الدهبى ، ممكن تعملى جنبها صوص عبارة عن ( طحينة / زبادى / توم مفروم / زيت زيتون / نص لمونة / شوية خل ) يتقلبو جامد ، بنجيب طبق نحط الرز الاول و بعدها الصوص و قطع الفراخ و قطع العيش الشامى تزوقيه على طرف طبق التقديم .