كوسة بالبشاميل

-طريقة عمل كوسة بالبشاميل

بتجيبي كمية الكوسة اللى هتعمليها بنغسلها كويس و بعدين نقطعها دواير مش تخينة و مش رقيقة اوى و تتبليها بملح و فلفل اسود و بهارات فراخ و بابريكا و سيبيها ١٠ دقايق. 

بعدين تجيبي طاسة فيها معلقتين زبدة و تنزلى بالكوسة تفضلى تشوحيها لحد ما تدبل و تاخد لون و تحسي انها استوت اطفى عليها ، نعصج اللحمة المفرومة نحط عليها بصلة صغيرة و توابل و نقلب لحد ما تتعصج ، نعمل البشاميل معلقتين دقيق كبار عليهم ٣ معالق زبدة و نقلب لحد ما لون الدقيق يبقي دهبى نطفى و نسيبه يهدى شوية بعدين ننزل اللبن بارد و لازم يكون بار مش سخن عشان الدقيق ميكلكعش بالراحة مع التقليب على البارد لحد ما الدقيق يمتزج مع اللبن و ميكنش فيه اى كلاكيع بعدين نحطهم على النار تانى و نقلب كويس لحد ما القوام يبقي كريمي لا تقيل و لا خفيف ، ممكن تحطى جبنة نستو لو عندك او تبشري جبنة رومي او تحطى جبنة كريمى كل دا بيديها نكهة حلوة اوي ، نجيب كوباية نحط فيها مرقة دجاج و مية و فلفل اسود و نقلبهم جامد و ننزل على البشاميل و نقلب لحد ما كله يمتزج ببعضه و القوام يبقي كريمي نقفل. 

نجيب الطاجن نحط شوية بشاميل من تحت و بعدين نحط طبقة كوسة و بعدها طبقة لحمة مفرومة و بعدها بشاميل و بعدها اخر طبقة كوسة و اخر طبقة بشاميل و بعدين طبقة جبنة موتزاريلا و تدخليها الفرن مش هتاخد ١٥ دقيقة و بالهنا و الشفا.