Chef expresso

-طريقة عمل كباب حلة بنقطع اللحمة قطع صغيرة و نقطع بصل و فلفل شرايح و توم و مشروم لو موجود ، بنشوح اللحمة مع البصل و الفلفل و التوم و المشروم و نحط توابل فلفل اسود / كمون / كسبرة / حبهان / ورق لورى / قرفة خشب / بهارات لحمة ، نغطي ١٠ دقائق كدا لحد ما اللحمة و البصل تنزل مايتهم و اللحمة تاخد لون ، بنزود شوية ماية صغيرين و نغطي لحد ما اللحمة تستوى هتكون الماية قلت و عملت صوص حلو.  المكرونة بالخضار السوتيه بنسلق المكرونة عادى و نصفيها ، بنقطع كوسة و جزر و فلفل شرايح و نشوحهم مع معلقة زبدة لحد ما يدبلو ، فى نفس الوقت نفرم ٥ طماطم و نسبكهم لما الخضار يستوى نرميهم على التسبيكة و نحط بابريكا و نظبط ملح و فلفل اسود و روزمارى و بعدها نرمى المكرونة و نقلب و بس كدا بالهنا و الشفا. 

-طريقة عمل صينية بطاطس بوريه بالبشاميل اللحمة المفرومة بنفرم بصلاية كبيرة نصفيها من مايتها و نخلطها باللحمة مع ملح و فلفل و بهارات لحمة و نسيبها شوية ، نسلق بطاطس بقشرها و بعد السلق نقشرها و نهرسها كويس و نظبط ملح و كمون ، بنعمل البطاطس كور كدا و نحطها فى الصينية و بعدها اللحمة المفرومة كور برضة و نحطها فوق كور البطاطس ، نعمل بقى البشاميل فى حلة نحط ٣ معالق كبار زبدة و معلقتين دقيق و نقلب لحد ما يوصل للون الدهبى نطفي و ننزل باللبن البارد مش سخن و نقلب بالمضرب لحد ميكنش فى كلاكيع خالص ، نحطها ع النار تانى و نقلب و نحط اى نوع جبن عندنا رومى مبشور / موتزاريلا / شيدر / نستو ، نجيب كوباية فيها ماية و مرقة دجاج و فلفل اسود و نحطها على البشاميل و نقلب لحد ما يوصل للقوام الكريمى  ، نصب البشاميل فى الصينية حوالين البطاطس و الكفتة و ندخلها الفرن على درجة حرارة ١٨٠ لمدة ربع ساعة نطلعها و نحط على وشها موتزاريلا و ندخلها تانى و نتابعها لحد ما تستوى. 

-طريقة عمل مكرونة بالجمبرى هنسلق المكرونة و نصفيها و قبل ما نصفيها ناخد كوباية من ماية السلق ، فى صينية هنحط معلقتين زيت زيتون و الجمبرى و توم مهروس و جنزبيل و هنقلب لمدة ٣ دقايق و نضيف ماية السلق ، نسيبهم على النار شوية لحد ما الجمبرى يشرب ماية السلق هنضيف كريمة طهى و معلقة صويا صوص  و نقلب دقيقتين و ننزل عليهم المكرونة نقلب و نحط على الوش جبنة موتزاريلا و بقدونس حسب الرغبة.

-طريقة عمل كفتة الحاتى  بنجيب اللحمة المفرومة و يفضل يبقى فيها نسبة دهن ٢٥٪؜ ، بنفرم بصلاية كبيرة و نصفيها من مايتها تماما و نسيب الماية هنحتاجها بعدين ، بنحط البصل على اللحمة و معاها ملح و فلفل اسود و بهارات لحمة و ندعك جامد بعدها نحط نص معلقة صغيرة بيكنج صودا ( بيكربونات الصوديوم ) لو مفيش ممكن نستبدلها بمعلقة بيكنج بودر ، نقلب الكفتة جامد و نسيبها ترتاح حوالى ١٥ دقيقة ، نجيب اسياخ و نبتدى نصبع الكفتة و احنا بنصبع نستخدم ماية البصل نبل ايدنا بالماية و نمشيها على الكفتة بعد التصبيع ، ندخلها الفرن على درجة حرارة ٢٠٠ حوالى نص ساعة ، بعد ما نخرجها من الفرن نولع فحمة و نحطها فى نص الصينية و نقفل بفويل ١٠ دقايق و بالهنا و الشفا. 

-طريقة عمل الكيكة  أولاً : المقادير   ١- ٢ كوب دقيق  ٢- ٣ بيض  ٣- نص كوب زيت عليه معلقة سمنة  ٤- كوب الا ربع لبن  ٥- كوب سكر  ٦- رشة فانيليا  ٧- معلقة كبيرة بيكنج بودر  ثانياً : طريقة التحضير   بنحط فى الخلاط اللبن و البيض و الزيت و السكر و نضرب جامد ، و فى بولة نحط الدقيق و البيكنج بودر و الفانيليا و نقلب و نحط عليهم الخليط اللى خلطناه و نضرب بالمضرب اليدوى لحد ما يمتزج القوام ، بنجيب الصينية ندهنها بالفرشة زيت عشان متلزقش  و نبطنها برشة دقيق لو تيفال مش لازم ندهنها و بعدين نصب المكونات فى الصينية و لو عايزة تبشرى شوكولاتة براحتك عايزاها سادة برضه براحتك ، ندخلها الفرن على درجة حرارة ٢٠٠ و نظبطها تكون فى نص الفرن و نسيبها من ٢٠ ل ٣٠ دقيقة اهم حاجة منغتحش عليها قبل تلت ساعة عشان متهبطش ، نختبرها بخلة لو طلعت نضيفة يبقى خلاص استوت لو كانت استوت و الوش لونه فاتح بنفتح الشواية دقيقتين بالظبط و انتى واقفة جنبها عشان متتحرقش و تقفلى ، و يفضل بعد ما تكلو منها تغطى الباقى عشان تفضل طرية و متتعرضش للهوا. 

-طريقة عمل مكرونة بالوايت صوص و الدجاج  مقادير الوايت صوص :  ١- كوب لبن  ٢- معلقتين دقيق  ٣- معلقتين سمنة  ٤- كريمة طهى  ٥- ملح  ٦- فلفل اسود  بنسلق المكرونة عادى و نصفيها ، و على نار هادية فيها معلقتين سمنة و معلقتين الدقيق و نقلب كويس لحد ما اللون يبقى دهبى نطفى النار ، نضيف اللبن البارد و الكريمة ( لو مفيش كريمة ممكن نجيب كيس شوربة كريمة الدجاج من ماجى او كنور )  و نقلب جامد لحد ما القوام يتماسك نرجعهم على النار تانى و نحط ملح و فلفل اسود و بهارات و نقلب لحد ما يبقى القوام كريمى نضيف المكرونة و نقلب بس كدا. الفراخ بنسلقها عادى و نحضر ٣ اطباق طبق دقيق / طبق بيض و فلفل اسود / طبق فيه كورن فليكس بنطحنه قبلها نص طحنة و ملح و فلفل اسود و مرقة دجاج ، بنحط الفراخ فى الدقيق / البيض / الكورن فليكس و نغطيها بأسترتش و ندخلها الفريزر شوية عشان تتماسك ، ساعتين و نطلعها و نقلى فى زيت سخن و بس كدا بألف هنا.

-طريقة عمل الكريم كراميل  اول حاجة بنعمل الكراميل بنكرمل كوباية سكر فى الصينية اللى هنعمل فيها الكريم كراميل على النار و نقلب جامد لحد ما يسيح و يبقى لونه دهبى نطفى و نسيبه يبرد خالص ، بعدها نحط فى الخلاط ٥ بيضات و كوباية سكر و فانيليا و نضرب جامد لحد ما يتضاعف حجمه ، بعدها نغلى على النار كوبايتين لبن كبار بعد ما يغلى نطفى عليه و نصب الخليط اللى فى الخلاط على اللبن و نقلب كويس و بعدها نصبه على الكريم كراميل بعد ما نتأكد انه برد خالص ، نجيب صينية اكبر من صينية الكريم كراميل فيها ماية سخنة و نحط جواها صينية الكريم كراميل و ندخلها الفرن على درجة حرارة ٢٠٠ على الرف اللى تحت و تتابعيه لو حطيتى السكينة و طلعت نضيفة يبقى خلاص استوى هو بياخد حوالى ساعة الا ربع او ساعة بالكتير ، بنطلعه و نحطه فى التلاجة و بس كدا بألف هنا.

-طريقة عمل البسلة  البسلة من الخضار المفيدة جدا و اكلة متداولة فى كل البيوت.  بنسلق اللحمة الاول و بنفصص البسلة و نقطع الجزر مثلثات صغيرة و نغسلهم كويس ، نفرم بصلة و شوية توم و ٤ او ٥ طماطم  كبار ، فى حلة فيها معلقة سمنة نشوح فيها البصل و التوم بعدها ننزل باللحمة و توابل ملح و فلفل و بابريكا و بهارات نقلب شوية و ننزل بعصير الطماطم و معلقة صلصة نسيبها تتسبك شوية و فى الاخر ننزل بالخضار و نزود شوربة و نغطى نسيبهم ١٠ دقايق كدا عشان البسلة مش بتاخد وقت فى السوا و نطفى ، نكون مجهزين الرز فى حلة فيها زيت او سمنة نشوح الشعرية جامد و ننزل بالرز نشوحه شوية بعدها ننزل بالشوربة يدوب يغطى الرز بشوية قد عقلة الصابع كدا اول ما الشوربة تغلى نوطى خالص و نغطى لحد ما يستوى.